送別後,回到現實

              星期六晚,炒完散再去睇波,又攪到好晏先訓,到星期日(30號),訓到成點半至起身........

 

              洗頭沖涼後........成個醒晒,編定黎緊個禮拜o的柯打,call阿儀,佢話o係旺角等喎........

 

              換左黑衫黑褲,掛條頸巾,揹個袋,出門口.......(14:50)

 

              搭地鐵......出到去,見仲有時間,行左去黑布街間南豐茶餐廳食的o野先......食到一半,阿儀call,話齊人喎,我又拿拿聲埋尾兼埋單.........

 

              行過去兆萬,會合埋阿恆、細明、雋雋,仲有o個件野,搭車過紅磡,再行去--萬國,去見一個人........

 

             " 司徒,希望你安息,o係另一個世界快樂o的,晤好鑽牛角尖啦~ "

 

              五點半離開,我送埋阿雋過九香,跟住自己走去漢口道HMV......終於俾我搵到

 

             

 

              因為有.......

 

              

 

              裡面有........

          

                

                                   

 

                搭地鐵走人.......o係大窩口站落車,番熊貓!(19:45)

 

                做埋星期六剩落o既手尾(若果留番禮拜一,肯定趕死)......八點零,Claire找我,話星期三去小肥羊食飯,同阿珊w/老表慶祝生日咁話........

 

                到十點半,撇......行行下feel到肚餓(係喎,晚餐都未食),經過麥記買份開心樂園餐拎走,番屋企慢慢嘆,仲有呢隻,送o既!

 

     

            

廿五廿六

                又放自己兩日假,因為好想抖一抖............

 

　　　　25號,訓到下晝.....阿儀call,話出尖咀行下街影下相.......

 

　　　　由HMV......到新港中心......海港城........再過新世界中心.......

 

                夜晚,o係金馬倫道金星join阿傑,打左一陣機......之後兩條友一路行.............行到落旺角！去財記食埋燒夜,跟住番屋企.......寫blog,再睇電視睇到訓著為止.........

 

                26號,十點就起身勒(因為不斷提自己試下早起一日,變左冇乜點訓),落街買菠蘿飽做早餐,嘆下報紙咁.......

 

                食過午飯,跟住就執房(有好多垃雜野).......執執下拎部即影即有影相,攪到執晤晒,唯有下次再執.......

 

　　　　就係咁係屋企過埋呢一日,明天又要番工.....慘慘慘～ 

平安夜.單身夜(已加圖)

             12月24日,照常地忙碌......做到有少少火......

 

             中午,會計部攪party(每年都有),照例上11樓又食又抽獎咁.......繼staff party後又抽到冬菇一盒,唉......

             

 

             不停地加速......6點前終於完成手頭上的工作,閃!

 

             過銅鑼灣,街上好多人......到Parkline hotel開工(1930-2330)......

 

             上到經理房,Patrick煞有介事咁同我講:今晚早食,已經編晒位,要我做後欄(即係清垃圾,搬搬抬抬o個o的),仲要係28樓.......

 

              都打左咭換晒衫咯,就咁走人咩,梗係做啦...........流晒汗...........最後收12點,連倒數都冇得玩........

 

              放工,出埋糧(cash,成3舊水架),條街依然咁多人,不停聽見o的教友又叫又唱歌(仲派朱古力),佢地好興奮,我就冇乜feel.......

 

              四圍行下,由東角道開始.....世貿o個邊o岩o岩棒棒堂攪完倒數,仲係好多人聚集...... 原來駱克道有間義順......o係銅鑼灣廣場間機鋪喱左一陣,但係地牢收得晤好,又行番出黎......經波斯富街過去時代廣場,有位女子o係度拉二胡,感覺幾蒼涼;行去對面羅素街間24小時麥記借廁所,唔...呢間野o的design同座位都good喎......又走去UA睇睇,原來仲有兩點幾o既場次,but戲飛超貴($70).......

 

              等到阿傑來電,原本約好一齊燒夜,但佢仲未收得工......算了吧,番歸!

 

              搭地.....晤係,叫港鐵......閞始見到o的喪屍(即係玩到倦,坐係度o答晒頭),我就四圍望下有冇o的性感小背心+短裙+美少女..........

 

              番到荃灣,行左去惠康買嘉頓提子飽x道地柑桔檸檬作為燒夜............o係屋企一路食,又開電腦,o係msn同Kitty傾左一陣計...........然後一路睇電視,直至訓著~ ~ ~        

一個人

             工作,工作........不斷忙碌中.............

 

             很多時,回到家已是凌晨,甚至更夜(更早?),屋裡的人都已睡了,剩下來便是自己一個人的時間.........

 

             看影碟/電視節目,吃燒夜,閱報,上網,又充塞了不小時光..........

 

             是滿足?還是孤獨?

 

             有時候,望著天花,也會想想.......我究竟是甚麼?

 

             想到生活........想起舊事.........想想舊朋友.........不過,一多想,很快就會睡著了

 

             也許,做個好夢可以令人舒暢一點,雖然不是真實的...........

 

             也許,我需要真的休息一下............

 

             或許,我應該找個聆聽者,去聽聽我的內心..........

加班二三事

             撞鬼!已經連續OT左4晚,o的野都仲係清晤晒,MC呢個咁o既system,我覺得等於買十蚊十個橙,好似好抵,但的橙細隻又厚皮,搣完皮仲要乾爭爭冇水,好俾人搵笨o既感覺......

 

              今晚八點半收工,慢慢行下......到千色店,o係A1買番磅超軟方飽俾阿媽吃,有時七點幾就賣晒,今晚反而剩好多......跟住行上樓上Sport Corners,睇下曼聯的衫同褸,不過冇減價......再行過去荃豐,最底層賣老番台劇+日劇個檔,o的封面越黎越大陸,點叫人幫襯呀,再睇下隔離DVD錄影機,心郁郁,睇黎出bonus o個陣都走晤甩......

 

               經過地鐵站,九點三,入去Mrs Fields睇睇,嘩!巴士都未加,佢地的曲奇已經靜雞雞加一蚊($10),雖然九點半後買三送三o者,但以前俾三條仲有三蚊找,而家就......見今晚剩o既款又少,決定晤買......到南豐新之城,見到外圍o的雞蛋仔,好想買但晤知擺左幾耐冇買,入到裡面,經過山崎麵包,又想買十蚊8個o既朱古力旦糕仔,又忍住---我七點半至去麥記食左個開心樂園餐,飽o既感覺都未過,點可以又買野食???拿拿聲轉身走番屋企.....................

恭喜!鹿島鹿角

             禮拜六(1號),公司轉新system,第一日正式使用已經發現了晤少問題,好在仲可以改......

 

              食晏時間,阿Ken晤得閒,得我一個出去......1時30分,重要戰役開始......

 

              J League最後一輪 : 浦和紅鑽 鹿島鹿角 爭奪聯賽冠軍!!

 

             賽前紅鑽領先鹿角一分,只要呢場作客FC橫濱贏波,就算鹿角主場贏清水心跳10比0都冇用......

 

             之但係,波係圓o既,大部分球迷都估晤到,聯賽包尾o既FC橫濱,竟然o係上半場領先紅鑽一比零!同時,鹿角憑小笠原滿男o既入球,以同樣比數領先......

 

             下半場,紅鑽仍然未能追和之際,鹿角再由本山雅志同馬昆奴斯各入一球,3比0,鎖定贏波戰果.....

             

              最終,鹿島鹿角重奪聯賽冠軍!我同成班球員一樣咁興奮......

             

 

              因為,早在七月,當鹿角落後紅鑽十幾分o個陣,我買左廿蚊鹿島鹿角贏聯賽冠軍,成25倍架,仲諗住冇乜chance,當六合彩賭啦......

 

              咁都可以執番五舊水番黎,多謝晒,根占真伍(橫濱入波o個位球員)!

 

             

 (如果我o係球場裡面,一定嗌到顛!)