2007年9月27日 星期四

保姆日記

                        



                         今日,去左海運睇呢套戲......

 

                         因為有張買一送一coupon未用(月底到期),阿Scarlett Johansson又幾吸引(樣靚身材正),又有阿火仔Chris Evans,應該都OK掛.......


                          但......令人失望,成套戲平平淡淡,冇高潮位(又晤可以話悶,我諗原著會好睇o的);演員自己做自己野,毫無火花;古仔雖然熟口熟面,但似係導演功力未能好好駕馭,或加添新意;甚至連音效都係平平(剩係播George Michael隻Freedom先出到o的surround),o徒晒o的料!!

 

                          下一套要去睇"色.戒",刺激番o的神經~~~

2007年9月25日 星期二

中秋.逛街

    係咪要行下街先至似過中秋?

    25號,照常六點放工(因為收四點半係寫字樓既專利),但做做下又遲晒(因為聽日放假,晤想責咁多野),要趕番屋企做節......

 

                食過飯沖埋涼,阿儀call,話約左Connie,問我出晤出黎......Connie番左香港成個月都未見過面,之前仲應承(話)請佢食飯......咁就出啦!

 

    十點四到旺角嘉樂商場門口,我已經遲左,點之Connie仲遲,原因係--佢已經變左......所以行得慢......

 

               佢地想搵個地方坐下,傾下既......諗諗,飯就食左,不如食下甜品......食雪糕?......

                Haagen-Dazs !!

                我叫左個店舖推介(Melon Sundae Fiesta),都係名牌有水準,好味道!!

                

    食完,係條街行......但得人多,又無乜野做,轉身又落左麥記,坐多陣,傾多陣......

 

    我又食左杯朱古力新地......               

 

                 then,歸家去 ~~

2007年9月18日 星期二

星期天@Mega Box

                  好多日晤得閒寫blog,攪到好似寫回憶錄....... 

                  星期日(16號),超早起床!

                   其實都係訓左兩個鐘左右(睇睇下薩拉戈薩個場直播就訓著左)......六點鐘仲識得醒,眼矇矇地刷牙洗面換衫,出門口.......番到公司已經係集合時間--06:30

                   o的同事到晒咁滯......即刻上公司車,直去九龍灣Mega Box !

                   事緣合和胡公子有份攪o既業餘冰上曲棍球賽(星期六+日),叫到公司同事幫手,邊有得託手肘,我被編今日去.......做o的乜?係做食蕉,仲要連皮(解釋: Security)

                   即是控制下秩序,留意下閒雜人等,加埋拎住個Walkie做下聯絡咁......

                   上年已經做過(o係西九龍中心),今年比較好做(新場加上設備好)......

                   有o的晤方便係,食野一定要o係商場入面(方圓幾里都冇食店),兼冇大家樂/大快活/美心/麥記,要使多錢食(公司有三文治供應,但.......)

                   到中午,得閒o的,可以有時間行下(因為我未黎過),到左間電器鋪,擺左個Gundam係門口......    

                  

                   睇清楚o的,係賣架,價錢係..........$35999 (見右手邊)

                   搵阿水買咩??

 

                   xxxxxxxxxx

                   終於,六點走人(個比賽係未完的),因為要趕番九香開工呢~~~

2007年9月14日 星期五

約戰--WCCF


                 今日(13號)有o的得閒,心血來潮,call小聰約搵日一齊去打WCCF,點之......佢話不如今晚喎.........

                 但又冇咁早,收工後我先去食o的野,跟住行左去荃灣新之城--金星遊戲機中心......

                 打住機等......又睇下人打Drumania,嘩!下下三百幾四百combo,犀利!

                 到十點零鐘,小聰call我,約左十一點三大河道卓悅門口等.......

                 早到左,係佳記整串魚旦,再加杯西瓜汁,又四圍望下......條街真係熱鬧!!

                 兩條友走去沙咀道天天......開波o剌......打下friendly march,用我隊車仔對佢隊雜牌軍......打打下,條友仔叫我輸一場俾佢,來換取黃金連攜一條(恩沙基x卡卡),我諗住一場半場o者,就應承左......

                 點之,隊波好似撞邪咁,再打friendly全部輸晒,跟住打regular leauge仲輸埋俾曼聯......

                 再加上,中左張閃咭[WDF--艾殊利高爾],但呢張係我剛剛o係YAHOO bit左.........(好灰~)

                    

                 通常晤開心都要食野發洩下,兩丁友去麥記食個餐,先叫做順番o的........(已經係凌晨一點半)

 

2007年9月10日 星期一

終於.......輪到傷風

               晤知點解,係咁打乞痴......

               知道自己領左野,星期六(8號)朝已經去左睇醫生......都晤敢食晒全部藥,怕藥力發作做晤到野,最終......到下晝都吽左,因為的藥真係幾勁......

                到收工,以為好番o的,走左去打機(WCCF)......之後,又一輪歐洲國家盃o既直播賽事,當然又係頂住眼訓睇埋啦......

 

                到星期日,中午起身後情況持續不穩,包括: 未能保持清醒,仍有咳嗽加上頭痛......晤敢四圍去,留係屋企休息吧!(仲係未出下星期散工o的order)

               一定要運動.....聽日做做緩步跑,因為我放假!

2007年9月6日 星期四

後遺症?

               自從上個禮拜胃痛左幾日之後..........

               呢個星期,無論係訓左3粒鐘或者7粒鐘,都係晤夠精神........

               就算收工晤去街,番到屋企,好早就想訓......甚至,睇睇下電視訓著左.......

               攪到好多野(執房/熨衫/bit貨/寫blog等)都晤夠時間做......

               希望係過渡時期,要快快回復健康......

               要做點運動了..........

 

 

 

               今晚(5號)收工,行左去商場內U-Right,探o下Jenny,聽佢發下嘮騷之餘(真係sales晤易做),順便幫襯買左三件特價T-shirt,加埋都係57蚊咋,抵!